काठमाडौं — राष्ट्रिय लोक भजन चुड्का संरक्षण प्रतिष्ठान नेपालले बागमती प्रदेश आयोजक र काठमाडौं जिल्ला सह-आयोजकका रूपमा आयोजना गरेको बनभोज कार्यक्रम चन्द्रागिरि नगरपालिकाको त्रिभुवन पार्कमा भव्य रूपमा सम्पन्न भएको छ। कार्यक्रमलाई चन्द्रागिरि नगरपालिकाका मेयरको विशेष उपस्थितिले अझै गरिमा प्रदान गरेको थियो।
उक्त कार्यक्रम नेपाली लोक सांगीतिक क्षेत्रका प्रतिष्ठित कलाकारहरूको सहभागिताले झन् रंगिन बनेको थियो। कलाकारहरू नारायण खनाल ‘लेकाली’, बम बहादुर कार्की, दुर्गा रायमाझी, नवीन पौडेल, नारायण रायमाझी, देवी हमाल लगायतले आ-आफ्ना उत्कृष्ट प्रस्तुतिहरू दिएर उपस्थित भजनप्रेमीहरूलाई मन्त्रमुग्ध बनाएका थिए।
कार्यक्रममा लोक भजनका केन्द्रीय अध्यक्ष नारायण पोखरेल, बागमती प्रदेश अध्यक्ष गोविन्द नेपाल, र काठमाडौं जिल्ला अध्यक्ष मुकुन्द प्रसाद घिमिरेको विशिष्ट उपस्थिति रहेको थियो। घिमिरेले बेजोड भजन प्रस्तुति दिँदा वातावरण भक्तिमय बनेको थियो।
अन्त्यमा, बागमती प्रदेश अध्यक्ष गोविन्द नेपालले कार्यक्रमको औपचारिक समापन गर्दै सबै सहभागी, कलाकार, र आयोजकहरूलाई धन्यवाद ज्ञापन गर्नुभयो। यस कार्यक्रमले नेपाली लोक भजन परम्पराको संरक्षण र प्रवर्द्धनमा महत्वपूर्ण योगदान पुर्याएको सहभागीहरूको धारणा रहेको छ।